"Barselona" bosh murabbiyi Xans-Diter Flik vinger Rafinya Diasni asosiy tarkibda maydonga tushirmaslikka qaror qilganini izohladi.
Braziliyalik futbolchi yakshanba kungi "Valensiya"ga qarshi o‘yinni zaxira o‘rindig‘ida boshladi va tanaffusdan so‘ng debyutant Runi Bardjining o‘rniga maydonga tushdi. Zaxiradan maydonga tushganidan ko‘p o‘tmay, "ko‘k-anorranglilar" hujumining 28 yoshli yetakchisi dubl qayd etdi. Bellashuv kataloniyaliklarning yirik 6:0 hisobidagi g‘alabasi bilan yakunlandi.
O‘yindan oldin OAVda Flik Rafinyani kechikib kelgani uchun jazo sifatida asosiy tarkibdan chetlatishga qaror qilgani haqida ma’lumot paydo bo‘ldi. Murabbiy bu ma’lumotni tasdiqlamadi.
"Yo‘q, bu texnik yechim. Biz Runini tanladik, chunki u a’lo darajada mashq qildi, uning kayfiyati va ishga munosabati aql bovar qilmaydigan darajada," - deya Flikning javobini keltiradi Barca Universal.
