"Ювентус" бош мураббийи Игор Тудор Чемпионлар лигаси доирасида Дортмунднинг "Боруссия"сига қарши ўйиндан кейин (4:4) футболчиларни алмаштириш муҳимлиги ҳақида фикр билдирди.
Туринликлар 94 ва 96-дақиқаларда киритилган голлар эвазига мағлубиятдан қутулиб қолишди. Ўйин қаҳрамони Душан Влахович бўлди - у иккита гол урди ва голли узатмани амалга оширди. Душан 60-дақиқада майдонга тушганди.
"Ўйинлар ҳар уч кунда бўлиб ўтади, ҳозир эса ўйинларни асосий таркибда бошлайдиган аниқ белгиланган футболчилар деярли йўқ.
Буни жамоага доим такрорлайман. Ўйинлар натижаси сўнгги 20 дақиқада ҳал бўлади. Бугун бу яна бир бор исботланди.
Бешта алмаштириш қилингандан кейин футбол ўзгарди", - деди Тудор матбуот анжуманида.
