"Бавария" ҳужумчиси Харри Кейн Чемпионлар лигаси тарихидаги энг сермаҳсул англиялик футболчига айланди.
32 ёшли футболчи бугун "Челси"га қарши кечган баҳсда дубль қайд этди. Squawka хабарига кўра, Кейн Чемпионлар лигасида инглизлар ўртасида энг кўп голда иштирок этган футболчига айланди - 53 (42+11). "Бавария" ҳужум чизиғи етакчиси Дэвид Бекхэмни (52) ортда қолдирди.
Харри Кейн Мюнхен суперклубида 2023 йилдан буён тўп тепиб келмоқда. Германияга кўчиб ўтишдан олдин ҳужумчи ўз ватанида "Тоттенхэм"да ўйнаган.













