Мадриднинг "Атлетико" клуби ярим ҳимоячиси Маркос Льоренте "Ливерпуль"га қарши ўйинда дубль қайд этди, аммо жамоасини мағлубиятдан (2:3) қутқариб қололмади.
30 ёшли футболчи 81-дақиқада иккинчи голни уриб, "матрасчилар"ни деярли дурангга яқинлаштирганди, аммо "қизиллар" барибир ўз мақсадига эришди - Виржил ван Дейк ҳакам томонидан қўшиб берилган дақиқаларда ғалаба голига муаллифлик қилди.
Льоренте ҳисобида Чемпионлар Лигаси доирасида "Ливерпуль" билан "Энфилд"да бўлиб ўтган учрашувларда жами тўртта гол бор - бу шу кунгача "Реал"нинг собиқ ҳужумчиси Карим Бенземага тегишли бўлган турнир рекордини такрорлашдир.
Эътиборлиси, Маркос Льоренте "Ливерпул" майдонида ЕЧЛдаги голлари умумий сонининг ярмидан кўпини - еттитасидан тўрттасини урди.
