"Манчестер Сити" ярим ҳимоячиси Фил Фоден жамоадоши Эрлинг Холанднинг ўйинига қойил қолди.
Норвегиялик футболчи бугун ЕЧЛ доирасида "Наполи"га (2:0) қарши кечган ўйиннинг 56-дақиқасида инглизнинг узатмасидан гол урди. Бу форварднинг турнирдаги 50-голи бўлди - у бу кўрсаткичга атиги 49 ўйинда эришган ҳолда рекордчига айланди.
"Эрлинг барча рекордларни янгилайдиганга ўхшайди. Шундай ёшида нималарга эришганига ақл бовар қилмайди. Агар у шундай ўйнашда давом этса, ҳеч ким унинг ютуқларидан ўзиб кета олмайди, деб ўйлайман. Ажойиб ўйинчи, у бизга жуда керак," - деди Фоден TNT Sports билан суҳбатда.
