Жиззах шаҳридаги “Наврўзбулоқ” пойгагоҳида мотокросс бўйича вилоят очиқ турнири бўлиб ўтди.
Ўзбекистон Республикаси мудофаасига кўмаклашувчи “Ватанпарвар” ташкилотининг вилоят кенгаши ташаббуси билан ташкил этилган мусобақада республикамизнинг турли вилоятларидан ташриф буюрган 50 га яқин мотоспортчи ғолиблик учун кураш олиб борди.
Мусобақа шартларига кўра, пойга иштирокчилари двигатель ҳажми 65, 85, 125, 350, 500 см3 бўлган спорт мотоциклларида баҳсларга киришдилар.
Якуний натижаларга кўра, жиззахлик Марсел Галиев, Абубакр Акбаров, Зафар Акбаров, Илёс Назаров, Толибжон Қудратов ҳамда Азиз Туроповлар ғолиб ва совриндорлар сафидан жой олишди.
Ғолиб спортчилар ташкилотчилар томонидан диплом ҳамда эсдалик совғалар билан тақдирланишди.
