France Football журналининг ўтган мавсум якунлари бўйича энг яхши ёш футболчига овоз бериш натижалари ҳақида маълумот пайдо бўлди.

Эслатиб ўтамиз, кетма-кет иккинчи йил мукофот "Барселона"нинг 18 ёшли ҳужумчиси Ламин Ямалга насиб этди ва бу сафар у овоз бериш жараёнида 124 очко тўплади. Бу ҳақда "Олтин тўп" матбуот хизмати ижтимоий тармоқларда маълум қилди. Иккинчи ўринни эгаллаган "ПСЖ" аъзоси Дезире Дуэ 72 очко, унинг жамоадоши Жоау Невеш эса 23 очко жамғарди. Дарвоқе, "Челси" вакили Эстеваода ҳам шунча очко бор. Қолган барча даъвогарлар 10 баллга ҳам ета олишмади.

Ўтган мавсум давомида Ямал 55 та учрашувда 18 та гол урди ва 25 та голли узатмани амалга оширди.