29-сентябрь куни «Насаф» клуби ОФК Элит чемпионлар лигаси 2-тури доирасида Саудия Арабистонининг «Ал-Ҳилол» жамоасини қабул қилади. Келинг, ушбу жамоа ҳақида бироз тўхталамиз.

«Ал-Ҳилол» жамоаси 68 йиллик тарихга эга. Клуб 1957-йилнинг 16-октябрь санасида ташкил этилган.

Жамоага мухлислар томонидан "Аз-Заъийм" (бошлиқлар), "Blue Whales" (кўк китлар) ва "Blue Power" (кўк қудрат) каби номлар берилган. Шунингдек, Халқаро футбол тарихи ва статистикаси федерацияси (IFFHS) 2009-йил «Ал-Ҳилол»ни Осиёнинг ХХ асрдаги энг кучли клуби дея эътироф этган.

«Ал-Ҳилол» ўз уй учрашувларини Ар-Риёд шаҳрида жойлашган Kingdom Arenaда ўтказмоқда. Ушбу майдон ўз бағрига 26 мингдан зиёд мухлисни сиғдира олади.

Жамоа Саудия Арабистони Профессионал лигасининг 19 карра чемпиони, 11 карра Қирол кубоги соҳиби ва яна 4 карра Осиё чемпионлар лигаси мусобақасининг ғолиби саналади.

Жамоа шу вақтга қадар Осиё Футбол Конфедерацияси томонидан ўтказиладиган расмий мусобақаларда 243 та ўйин ўтказган. 137 та ўйинда ғалаба қозонган, 49 та ўйин риёдликларнинг мағлубияти билан якунланган. 57 та баҳсда дуранг натижа қайд этилган.

Жамоани айни пайтда 49 ёшли италиялик мутахассис Симоне Индзаги бошқармоқда. Ушбу мутахассис Италиянинг «Лацио» ва «Интер» жамоаларидаги фаолияти билан кўпчиликка яхши таниш. Унинг бошқарувида «Интер» клуби Италия А серияси ва кубонида ғолибликни қўлга киритди. УЕФА чемпионлар лигаси мусобақасида 2 марта финалга қадар етиб боришни уддалади. Инзаги 2025-йилнинг 4-июнь санасидан бери «Риёд» шаҳри клубига устозлик қилиб келмоқда.

«Ал-Ҳилол» жамоаси таркибида айни вақт «Севилья» клуби собиқ посбони Яссин Буну, «Челси» клуби собиқ ҳимоячиси Калиду Кулибали, «Милан» жамоаси собиқ аъзоси Тео Эрнандес, «Манчестер Сити» собиқ вакили Жоау Канселу ва «Ливерпул» жамоаси собиқ ҳужумчиси Дарвин Нунйез каби футболчилар тўп сурмоқда.

Эслатиб ўтамиз, ОФК Элит чемпионлар лигаси 2-туридан ўрин олган «Насаф» – «Ал-Ҳилол» баҳси 29-сентябрь куни бўлиб ўтади. Ўйин 18:45 да старт олиши кўзда тутилган.