Антидопинг қоидаларини бузганлиги сабабли дисквалификация муддатини ўтаган ярим ҳимоячи Поль Погба ўз фаолиятини "Монако"да қайта жонлантирмоқчи.

Футболчи ёзда Лига 1 жамоасига ўтган бўлса-да, ҳозиргача бирорта ўйинда майдонга тушмаган - Погба ҳали ҳам спорт формасини тиклаяпти. Монегасклар бош мураббийи Ади Хюттер Поль қачон майдонга қайтиши ҳақида маълумот берди.

"Биз унинг "Ницца"га қарши ўйинда таркибда бўлишини кутгандик. Бироқ "Анже"га қарши ўйинни кутишимизга тўғри келиши мумкин. Умид қиламизки, Погба терма жамоалар ўйинлари учун танаффусдан сўнг майдонга чиқишга тайёр бўлади," - дея Хюттер журналистларга маълум қилди.

Франция чемпионати доирасидаги "Анже" ва "Монако" ўртасидаги учрашув 18 октябрь, шанба куни бўлиб ўтиши режалаштирилган.