"Тоттенхэм" ярим ҳимоячи Родриго Бентанкур билан шартномани узайтирди.
Уругвайлик 28 ёшли футболчи билан аввалги келишув 2026 йилнинг июнигача амал қилар эди. Янги муддатга аниқлик киритилмади, фақат у узоқ муддатли деб кўрсатилди.
"Ўзимни жуда яхши ҳис қиляпман ва бу ажойиб клубда ўз ҳикоямни давом эттиришдан хурсандман. Оилам бахтли. Ҳар куни астойдил ишлайдиган ажойиб дўстларим ва жамоадошларим бор. Мен бу клубни яхши кўраман ва бу ерда ўзимни жуда яхши ҳис қиламан.
Европа Лигасидаги ғалаба фантастик лаҳза бўлди ва биз бу муваффақиятни янада ривожлантириб, кўпроқ совринларни қўлга киритишни истаймиз. Бизда янги бош мураббий, янги сардор бор ва мен клубда яна кўп йиллар ўтказмоқчиман," - деди хавбек.
2022 йил январь ойида "Ювентус"дан "Тоттенхэм"га ўтганидан сўнг, Бентанкур Лондон клуби сафида 122 та ўйинда майдонга тушиб, 9 та гол урган.
