Янги Зеландия ёшлар терма жамоаси Туркиядаги жаҳон чемпионатининг гуруҳ босқичидан чиқа олмади. Улар Ўзбекистон, Уругвай ва Хорватияга имкониятни бой беришди. Делегация Янги Зеландияга қайтиб борганидан кейин терма жамоа бош мураббийи Крис Милисич мусобақа ҳақидаги фикрларини билдириб ўтди.

— Натижа сизни ҳайрон қолдирдими?
— Мусобақа биз учун оғир кечишини билардим. Ўзбекистон биз билан ўйингача 19та назорат ўйинини ўтказди. Бизда ҳам бундай ўйинларда иштирок этиш учун маблағ бор, аммо ўйинчиларни узоқ вақт давомида қандай қилиб банд қиламиз? Бизнинг энг катта муаммоимиз — Океания минтақасида иштирок этаётганимиздир.

— Мусобақада келажаги порлоқ юлдуз футболчиларни кузатдингизми?
— Ўзбекистоннинг 10-рақамли футболчиси (Жамшид Искандаров). Унинг интеллекти юқори. У ҳужум ортида ўйнади. Биз унга қаршилик қила олмадик. Уни таъқиб қиладиган бўлсак, у финт ишлатиб, футболчиларни ўзига жалб қилади. Унга бўш ҳудуд бериладиган бўлса, янада кенгроқ масштабдаги ишларни амалга оширади.