Кечадан бошлаб «Нефтчи» жамоаси иккинчи даврага тайёргарликни бошлаб юборди. Бу ҳақда клуб расмий сайти хабар тарқатди.

Жамоа аъзолари эрта тонгда клуб базасига тўпланишди ва Тошкент томон йўлга чиқишди. Режага кўра, фарғоналиклар 27 июлгача пойтахтда йиғин ўтказади. Йиғин давомида бир нечта ўртоқлик учрашувлари ўтказилиш режалаштирилган.

Ҳозирча йиғинда тўрт нафар янги ўйинчи – Носир Отақўзиев, Мўйдин Мамазулунов, Хислат Чилматов ва Ғайрат Ҳасановлар келиб қўшилишган. Эрта-индин яна бир қатор янги футболчилар сафга қўшилиши мумкин. Лекин ҳеч бир янги ўйинчи билан ҳали шартнома имзоланмаган. Муҳсин Низомитдинов ва Фахриддин Холмуродовлар эса жамоани тарк этишди.

Тошкентдаги йиғинга жўнаб кетган футболчилар рўйхати билан танишинг:
Фаррух Турдалиев, Хуршид Ходжаев, Шукурали Пўлатов, Иқбол Бобохонов, Дилёрбек Ирматов, Иқбол Акрамов, Санжар Асқаралиев, Сардор Мирзаев, Бахтиёр Ёқубов, Отабек Исроилов, Шерзод Ҳакимов, Мансур Саидов, Азиз Алижонов, Сардор Соипов, Отабек Зокиров, Умиджон Қодиров, Отабек Ҳайдаров, Носир Отақўзиев, Мўйдин Мамазулунов, Хислат Чилматов, Ғайрат Ҳасанов.