Златко Далич Хорватия терма жамоаси бош мураббийлигидаги 100-ўйиндан кейин ўз фикрларини билдириб ўтди.
Пайшанба куни Хорватия ЖЧ-2026 саралашида Чехия билан сафарда дуранг ўйнади (0:0).
"Бу мен учун жуда кўп нарсани англатади, мен жуда бахтлиман ва федерациямизга кейинги ўйинни ўз шаҳрим Вараждинда ўтказганимиз учун миннатдорчилик билдирмоқчиман.
Умид қиламанки, Гибралтарга қарши ўйинда уч очко оламиз ва жаҳон чемпионати сари навбатдаги катта қадамни ташлаймиз.
Бу ерда ўз йўлимни бошлаганимда, бундай маррага етиб боришимни хаёлимга ҳам келтирмагандим. Лекин шундай бўлиб қолди ва мен жамоамиз билан жуда фахрланаман. Сўнгги саккиз йил ичида биз ақл бовар қилмайдиган ишларни амалга оширдик. Учта медаллар тўплами, иккита жаҳон чемпионатига йўлланма", - деди Далич.
Хорватия Далич даврида ЖЧ-2018 кумуш, ЖЧ-2022 бронза медали совриндори бўлди ва Миллатлар Лигаси-2023да иккинчи ўринни эгаллади.
