"Бавария" марказий ҳимоячиси Дайо Упамекано молиявий талабларни пасайтирмоқчи эмас. Французнинг амалдаги шартномаси келаси ёзда ўз ниҳоясига етади, мюнхенликлар билан музокаралар давом этмоқда, бироқ келишувга эришилмаган.
Журналист Флориан Плеттенбергнинг ёзишича, 26 ёшли футболчи ва унинг агенти "Бавария"га ён босмоқчи эмас. Немис гранди раҳбарияти футболчининг маош ва комиссия тўловлари бўйича сўровларини қондириш ёки қондирмаслик масаласини ҳал қилиши керак.
Манбага кўра, Упамеканонинг эркин агент сифатида кетиши сценарийси ҳозирда реал кўринмоқда. "Бавария" спорт бўлими бошлиғи Макс Эберль марказий ҳимоячини сақлаб қолиш учун қўлидан келган барча ишни қилмоқда.
