Италия терма жамоаси бош мураббийи Женнаро Гаттузо Эстонияга қарши 3:1 ҳисобидаги ғалабадан сўнг интервью берди.

Итальянлар Мойзе Кин, Матео Ретеги ва Франческо Пио Эспозитонинг 4-, 38- ва 74-дақиқаларда киритган голлари туфайли устунликка эришди. Майдон эгалари эса 76-дақиқада дарвозабон Жанлуижи Доннарумманинг қўпол хатоси - тўпни қўлидан чиқариб юбориши натижасида 1 та гол билан жавоб қайтарди.

"Жижининг хатоси - шунчаки бир марталик янглишиш. Бир жамоа 90 дақиқа давомида бундай устунлик қилганини камдан-кам кузатиш мумкин. Бу ҳолат бизга ўйиннинг сўнгги дақиқасигача диққатни жамлаш нақадар муҳимлигини эслатиб туриши мумкин," - дея Гаттузонинг сўзларини келтиради Football Italia.

14 октябрь куни "скуадра адзурра" ўз майдонида Исроил терма жамоасига қарши ўйин ўтказади.