Лионель Месси "Интер Майами" ўйинида иштирок этиш учун Аргентина терма жамоаси қароргоҳини вақтинча тарк этишга қарор қилгани маълум бўлди.
38 ёшли ҳужумчи аргентиналикларнинг Венесуэлага қарши кечаги ўртоқлик учрашувида майдонга тушмади, аммо МЛСнинг "Атланта Юнайтед"га қарши баҳсида иштирок этди ва 2 та гол уриб, 1 та ассист берди.
Inter Miami News Hub хабарига кўра, Мессининг клуб қароргоҳига қайтиши Жорди Альба билан боғлиқ: Лео яқинда фаолиятини якунлаётганини эълон қилган жамоадоши билан хайрлашув маросимида иштирок этишни истаган.
Манбанинг таъкидлашича, Месси Альба ва Серхио Бускетс билан сўнгги ўйинларни ўтказиш имкониятини қадрлайди. Эслатиб ўтамиз, 36 ёшли хавбек йил охирида бутсаларини михга илади.
