"Реал"нинг бразилиялик ҳужумчиси Эндрик қишки трансфер ойнасида Италия А Сериясига кўчиб ўтиши мумкин. Бу ҳақда журналист Маттео Моретто маълум қилди.

Таъкидланишича, ёш ҳужумчи бўлажак жаҳон чемпионатида Бразилия терма жамоаси қайдномасидан ўрин олишга умид қилмоқда, шунинг учун у январь ойида клубини ўзгартиришга тайёр. Хаби Алонсо қўл остида "Реал"да бир дақиқа ҳам ўйнамаган Эндрик учун вариантлардан бири "Ювентус" бўлиши мумкин. Қайд этилишича, Эндрикка ёздаёқ "Ювентус" қизиқиш билдирган.

19 ёшли ҳужумчининг "қаймоқранглилар" билан амалдаги шартномаси 2030 йилнинг июнигача мўлжалланган. Transfermarkt мутахассислари футболчининг нархини 35 миллион еврога баҳоламоқда.