Туркиянинг "Галатасарой" клуби форварди Мауро Икарди Италиянинг "Торино" клубига ўтмайди. Бу ҳақда инсайдер Николо Скира хабар бермоқда.
Манбага кўра, ОАВда тарқалган миш-мишларга қарамай, Икарди "Торино"га ўтиши эҳтимоли нолга тенг. Таъкидланишича, томонлар ўртасида ҳеч қандай алоқа бўлмаган. Қолаверса, Икардининг ўзи ҳам бундай трансфердан манфаатдор эмас.
Икарди 2022 йилдан бери "Галатасарой" шарафини ҳимоя қилмоқда. Жорий мавсумда 32 ёшли аргентиналик футболчи барча мусобақаларда тўққизта ўйин ўтказиб, бешта гол урди.
Ҳужумчининг клуб билан шартномаси келаси ёзгача мўлжалланган. Transfermarkt экспертлари футболчининг нархини саккиз миллион еврога баҳоламоқда.
