ФИФА президенти Жанни Инфантино Португалия терма жамоаси ҳужумчиси Криштиану Роналдунинг навбатдаги рекордига изоҳ берди.

Сешанба куни 40 ёшли форвард Венгрияга қарши ўйинда (2:2) дубль қайд этди. Энди Роналдунинг ҳисобида жаҳон чемпионати саралаш босқичидаги 41 та гол бор - бу барча даврлар учун рекорд.

"Баракалла, Криштиану! 41 гол! Жаҳон чемпионати саралаши тарихидаги энг яхши тўпурар унвони билан табриклайман. Буюк футболчининг яна бир ақл бовар қилмас рекорди," - деб ёзди Инфантино ижтимоий тармоқда.

Роналду Португалия терма жамоаси сафида жами 225 та ўйинда 143 та гол урган. Футболчининг миллий терма жамоадаги дебюти 2003 йил август ойида бўлиб ўтган.