Бразилия терма жамоаси ва Мадриднинг “Реал” клуби ҳужумчиси Винисиус Жуниор ўзининг туғилган куни сабаб уюштирган зиёфати ортидан қамалиши мумкин. Бу ҳақда Mundo Deportivo нашри хабар берди.

Маълумотларга кўра, ҳужумчи туғилган кунини нишонлаш учун катта зиёфат уюштирган. Байрам Рио-де-Жанейродаги тўй ва бошқа йирик тадбирлар ўтказиладиган ҳашаматли жойда бўлиб ўтган.

Аммо зиёфат вақтида баланд мусиқа ва шовқин туфайли атрофдаги фуқаролар норозилик билдирган. Улардан бири полицияга мурожаат қилган. Ҳуқуқ-тартибот ходимлари байрамга келиб, мусиқа овозини пасайтиришни сўраган. Винисиус ва меҳмонлар бунга рози бўлган, бироқ полиция кетгач, зиёфат яна давом этган ва шовқин яна кўтарилган.

Кейинчалик қўшни томонидан берилган шикоят асосида суд иши очилган. Дастлабки суд жараёни 6 ноябрь кунига белгиланган. Бразилия қонунларига кўра, Винисиус жамоат тинчлигини бузгани сабаб 15 кундан 3 ойгача қамоқ ёки жарима жазоси билан жазоланиши мумкин.

Маълумот учун, Винисиус жорий мавсум “Реал” сафида жами 10 та ўйинда майдонга тушиб, ўз ҳисобига 5 та гол ва 4 та голли узатма ёздириб қўйган. Transfermarkt портали 25 ёшли футболчининг қийматини 150 миллион еврога баҳоламоқда.