“Реал Мадрид” ва “Барселона” клублари “Бавария” ҳимоячиси Даёт Упамеканони ўз сафига қўшиб олишни истамоқда. Бу ҳақда Foot Mercato нашри хабар бермоқда.

26 ёшли марказий ҳимоячи мюнхенликларнинг асосий таркиб футболчиларидан бири саналади. Бироқ унинг “Бавария” билан шартномаси жорий мавсум охирида якунланади. Томонлар янги битим борасида музокараларни бошлаган, аммо ҳозирда улар келишувга эриша олишгани йўқ. Аввалроқ “немис машинаси” франциялик ҳимоячига узоқ муддатли шартнома таклиф қилган, аммо бу таклиф футболчининг талабларига мос келмаган. Шу боис улар ўртасидаги музокаралар боши берк кўчага кириб қолган.

Шунингдек, Упамеканога Англиянинг иккита номдор клуби “Манчестер Юнайтед” ва “Ливерпуль” жамоалари ҳам қизиқиш билдирмоқда.

Маълумот учун, франциялик ҳимоячи 2021-йилнинг ёзида “Лейпциг”дан “Бавария”га 60 миллион евро эвазига ўтган эди. Жорий мавсумда у барча мусобақалар доирасида жами 14 та ўйинда майдонга тушиб, 1 та голли узатма муаллифига айланган. Transfermarkt портали футболчининг қийматини 50 миллион еврога баҳоламоқда.