Ногиронлиги бўлган шахсларни спортга жалб қилиш, уларнинг жисмоний фаоллигини ошириш ва ижтимоий интеграциясини таъминлашда спорт федерацияларининг ўрни қанчалик муҳим?
Шу муносабат билан Ўзбекистон адаптив спорт турлари ассоциацияси таркибидаги Карлар, Кўзи ожизлар спорт федерациялари ва Махсус олимпиада республика спорт жамоат бирлашмаси масъуллари иштирокида муҳокама йиғилиши бўлиб ўтди.
Йиғилишда 2025 йилнинг 9 ойи мобайнида амалга оширилган ишлар таҳлил қилиниши билан бир қаторда соҳадаги мавжуд муаммолар ва уларнинг ечимлари муҳокама этилди.
Шунингдек, йиғилишда фақатгина мусобақалар ўтказиш билан чекланиб қолмасдан, давлат спорт ва ихтисослаштирилган таълим муассасалари билан ҳамкорликни кучайтириш зарурлиги алоҳида таъкидлаб ўтилди.
Бу йўналишда Ассоциациянинг ҳудудий бўлинмалари, шу жумладан, спорт мактаблари, махсус таълим муассасалари ҳамда олий таълим муассасалари ўртасида ўзаро ҳамкорлик механизмларини шакллантириш, тренер ва мутахассисларни тайёрлашда иштирок этиш, адаптив спорт турлари бўйича таълим дастурларини такомиллаштириш муҳим вазифалардан бири сифатида белгиланди.
Келгусида бу йўналишдаги ишларни янада тизимли ташкил этиш ва қамровни кенгайтириш устувор вазифалардан бири сифатида белгилаб олинди.
