"Манчестер Сити"дан ижарага олинган "Эвертон" ҳужумкор ярим ҳимоячиси Жек Грилиш жорий мавсумда ўзини ажойиб тарзда кўрсатмоқда. Англиялик футболчи аввалги икки мавсумни яхши ўтказмаганди, аммо вазиятнинг ўзгариши унинг фойдасига ишлагани аниқ - ҳозирда 30 ёшли футболчини бемалол Девид Мойес жамоасидаги асосий фигуралардан бири деб аташ мумкин.
Журналистлар "шаҳарликлар" устози Хосеп Гвардиоладан Грилишнинг "ирислар" томонидан сотиб олинишини истайсизми, деб сўрашди.
"Унинг биз билан шартномаси бор. Ҳозир энг муҳими - унинг муваффақиятли ўйини. Балки "Манчестер Сити" уни қайтаришни истаб қолар, билмадим. Ҳали олдинда кўп нарсалар бор. Ҳаммаси кўплаб омилларга боғлиқ, аммо якуний қарорни клублар қабул қилади," - дея испаниялик мураббийнинг сўзларини келтиради Hayters TV.
Шанба куни "Манчестер Сити" АПЛ доирасида ўз уйида "Эвертон"ни қабул қилади.
Грилиш жорий чемпионатнинг еттита ўйинида битта гол ва тўртта голли узатмани амалга оширди.
