Мадриднинг "Реал" клуби ярим ҳимоячиси Арда Гюлер жамоанинг собиқ устози Карло Анчелотти ҳақида фикр билдирди. Айни пайтда италиялик мутахассис Бразилия терма жамоасида ишламоқда.
"Карло - тарихдаги энг яхши мураббийлардан бири. Бир пайтлар у журналистларга мен дунёдаги энг яхши ярим ҳимоячилардан бирига айланишимни айтганини унутмаслигимиз керак. Ўйнамаган пайтларимда қийналганман, лекин айтилган гаплар амбициямни ошириб юборган. Мен ўз имкониятимни кутдим," - дея Гюлернинг сўзларини келтиради Marca.
20 ёшли туркиялик футболчи "қаймоқранглилар" сафида 2023 йилдан буён тўп тепиб келмоқда. У жорий мавсум 10 та ўйинда 3 та гол ва 4 та голли узатмага муаллифлик қилган.
