Куни кеча "Бавария" бош мураббий Венсан Компани билан янги шартнома имзолаганини эълон қилди. Бельгиялик мураббий 2029 йилнинг ярмигача мўлжалланган шартнома тузди.
Чемпионлар Лигасидан ўрин олган "Брюгге"га (4:0) қарши ўйин якунлангач, журналистлар клуб бошқаруви раиси Ян-Кристиан Дризендан музокараларни қандай сир сақлаганини сўрашди.
"Одатда клубимиз Швейцария пишлоғидек илма-тешик бўларди, аммо бу сафар ҳеч нарса сизиб чиқмади. Биз энг муҳим ходим билан шартномани узайтирганимиздан жуда хурсандмиз ва ҳеч нарса оммага ошкор қилинмаганидан жуда мамнунмиз. Музокаралар узоқ давом этмади. Иккала томон ҳам бошланган ишни давом эттиришни хоҳлади - биз узоқ муддатли ҳамкорликка интиламиз," - деди Дризен DAZN’га берган интервьюсида.
Венсан Компани "Бавария"ни 2024 йилнинг ёзида қабул қилиб олганди.
