«Андижон» клуби ОЧЛ 2 доирасида Баҳрайннинг «Ал-Холидия» жамоасига қарши баҳсда дуранг ўйнагач, энди бор эътиборини миллий чемпионат учрашувларига қаратган. Жамоа етакчиларидан бири Сардор Азимов клуб матбуот хизматига интервью берди.

— «Андижон»нинг «Ал-Холидия»га қарши ўйини борасида нималарни айта оласиз?
— Яхши, чиройли ўйин бўлди. Мухлислар кутган ўйинни намойиш қила олдик, деб ўйлайман. Лекин ютиб байрам қила олмадик.

— Гарчи учрашув дуранг билан якун топган бўлсада, «Андижон»нинг намойиш этган ўйини кўпчиликка ёқди. Майдонда ўйнаган футболчи сифатида сизга ҳам манзур бўлдими?
— Бизга фақат ғалаба бўлганида манзур келарди. Насиб шу экан, кейинги сафар албатта ютиб ишқибозларимизни хурсанд қиламиз.

— Қизиқ томони, 3 та турда ҳам 0:0 қайд этилди. Бунга қандай изоҳ берасиз?
— Бизга ҳам роса қизиқ бўлиб боряпти. 3 та учрашувда 3 та дуранг. Биз албатта гуруҳдаги ҳолатимизни яхшилаймиз.

— Гуруҳдаги учала рақиб билан ўйнадинглар. Қайси рақиб кучлироқ экан?
— Тўғриси, менга «Ал-Аҳли» билан ўйнаган ўйинимиз бўлди.

— «Андижон»ни энди Термизда «Сурхон»га қарши ўйин кутяпти. Тайёргарлик қандай ва нима кутяпсиз?
— Учрашувдан кейин дарҳол «Сурхон» билан ўйинга тайёргарликни бошлаб юборганмиз. Чунки тақвим тиғиз. «Сурхон»га қарши яхши ўйин бўлади, деб ўйлайман. Мақсадимиз битта: ғалаба билан ортга қайтиш. Насиб бўлса, ютиб қайтамиз.