Испания чемпионати 10-турининг марказий ўйинида Мадриднинг "Реал" клуби ўз майдонида "Сантьяго Бернабеу"да Каталониянинг "Барселона" клубини 2:1 ҳисобида мағлуб этди.
"Қаймоқранглилар" вингери Винисиус Жуниор 72-дақиқада захирага олинди. Бразилиялик футболчи майдонни тарк этаётганида ғазабини яширмади. "Реал"нинг собиқ яримҳимоячиси Тони Кроос собиқ жамоадошининг муносабатига изоҳ берди.
"Ажойиб ўйин ўтказганингда, ҳар доим алмаштиришдан норози бўласан. Мени ҳам ўзгартиришган пайтлар бўлган, бу менга ёқмаган. Лекин мен ҳеч қачон ечиниш хонасига кирмаганман. Ўйлайманки, у совигандан кейин ғазабини боса олганини тушунади", - дея немиснинг сўзларини келтиради Marca газетаси.
Ғалабадан сўнг "Реал" "кўк-анорранглилар"дан 5 очкога ўзиб кетди.
