Каталониянинг "Барселона" клуби Перуда ўртоқлик учрашуви ўтказиши мумкин, дея хабар бермоқда Mundo Deportivo журналистлари.
Манбага маълум бўлишича, "кўк-анорранглилар" вакиллари Жанубий Америкада спарринг ташкил этиш бўйича музокаралар олиб бормоқда. Агар томонлар келиша олса, "Барселона" бу ўйиндан тахминан етти-саккиз миллион евро ишлаб олади.
Ханс-Дитер Флик шогирдлари сўнгги бор Испания Ла Лигаси 10-тури доирасида "Реал" Мадридга қарши баҳс олиб борди.
Каталония гранди "Сантьяго Бернабеу"да 1:2 ҳисобида мағлубиятга учради. Айни дамда "Барселона" 22 очко билан мусобақа жадвалида 2-ўринда бораётган бўлса, "қаймоқранглилар" (27) пешқадамлик қилмоқда.
