"Рома" директори Фредерик Массара "Жаллоросси" Пауло Дибала ва Лоренцо Пеллегрини билан шартномани узайтириш бўйича музокараларни ҳали бошламаганини айтди. Бу ҳақда Football Italia нашри хабар бермоқда.

Ушбу футболчиларнинг "Рома" билан тузган шартномалари мавсум охирида ўз ниҳоясига етади.

"Вазиятдан хабардормиз, аммо ҳозир эътиборимизни ўйинларга қаратганмиз. Шартномаси тугаётган футболчилар катта профессионаллик ва клубга содиқликни намойиш этмоқда. Ҳозирча улар билан ҳеч қандай музокара бошламадик», - деди Массара.

31 ёшли Дибала жорий мавсумда 8 та ўйинда 2 та гол ва 1 та голли узатмага муаллифлик қилди. У 2022 йилнинг ёзида "Ювентус" билан шартномаси тугаганидан кейин эркин агент сифатида "Рома"га ўтган. Пеллегрини клуб академияси тарбияланувчиси бўлиб, жорий мавсумда 5 та ўйинда майдонга тушди ва 1 та гол урди. У жароҳати туфайли май-август ойларида жамоа машғулотлари ва ўйинларида иштирок этмади.

Массара, шунингдек, молиявий чекловлар туфайли чемпионатда иккинчи ўринда бораётган клуб йирик битимлар тузишни режалаштирмаётганини таъкидлади.