Ғузордаги “Марказий” стадионида Суперлиганинг 27-туридан ўрин олган «Шўртан» — ОКМК учрашуви драматик тарзда ўтди ва сўнгги дақиқаларда кутилмаган бурилишларга бой бўлди.

Ўйиндан олдин “Насаф” мухлиси Маҳмуд Муҳаммадиев хотирасига 1 дақиқалик сукут эълон қилинди. Шундан сўнг жамоалар учрашувни юқори суръатда бошлашди. Илк дақиқаларданоқ меҳмонлар фаол ҳаракат қилдилар — Хуршид Ғиёсов ва Ойбек Рустамовнинг зарбалари Эшбўтаевни жиддий синовдан ўтказди. 39-дақиқада айнан Ғиёсовнинг зарбаси ҳисобни очди — 0:1.

Танаффусдан сўнг эса ғузорликлар ўз ўйинини топишди. 50-дақиқада Пўлатхўжа Холдорхонов ҳисобни тенглаштирди, ортидан эса унинг пенальтидан киритган голи жамоани олдинга олиб чиқди — 2:1.

70-дақиқада Абубакрризо Турдиалиев ҳисобни 3:1 кўринишга келтирди. Аммо ОКМК ҳам таслим бўлмади. 83-дақиқада захирадан тушган Али Абдураҳмонов ҳисобни қисқартирди, 90+4-дақиқада Наоки Сенага тенглаштирувчи голни урди — 3:3.

Шундай бўлса-да, “Шўртан” охирги сўзни айтди. 90+9-дақиқада захирадан майдонга тушган Жасурбек Ҳакимов жамоадошидан қайтган тўпни дарвозага йўллаб, ғалабани таъминлади — 4:3!

Ғузорликлар сўнгги дақиқалардаги иродали ўйин ҳисобидан муҳим уч очкони қўлга киритишди. Пўлатхўжа Холдорхонов икки гол билан жамоаси ғалабасига катта ҳисса қўшди.

«Шўртан» ушбу ғалаба эвазига ўз очколарини 15 очкога етказди. Аммо ғузорликларда Суперлигада жон сақлаб қолиш эҳтимоли жуда паст.

Суперлига, 27-тур
31 октябрь 2025 йил
Ғузор, “Марказий” стадиони
«Шўртан» — ОКМК 4:3
Голлар: 39' — Хуршид Ғиёсов (0:1), 50' — Пўлатхўжа Холдорхонов (1:1), 57' — Пўлатхўжа Холдорхонов (пенальти, 2:1), 70' — Абубакрризо Турдиалиев (3:1), 83' — Али Абдураҳмонов (3:2), 90+4' — Наоки Сенага (3:3), 90+9' — Жасурбек Ҳакимов (4:3)
Огоҳлантиришлар: Нуриддин Ҳасанов (28'), Азиз Холмуродов (45')