Ўзбекистон чемпионатининг 27-тури доирасида “Машъал” ўз майдонида "Қўқон-1912"ни қабул қилиб, кичик ҳисобда ғалаба қозонди.

Жамоалар баҳс бошида эҳтиёткор ўйин намойиш этишди. 13-дақиқада “Машъал” ҳисобни очди — Ҳумоюн Муртазоев бош билан рақиб дарвозасини ишғол қилди.

Голдан кейин мезбонлар устунликни сақлаб қолишга ҳаракат қилишди. Бунга қарамай, қўқонликлар ҳам жавоб ҳужумларини йўлга қўйишди. 19-дақиқада Андро Гиоргадзе узоқ масофадан кучли зарба йўллади, аммо дарвозабон аниқ ҳаракат қилди. 24-дақиқада Ҳасановнинг зарбасини ҳам дарвозабон қийинчилик билан қайтарди.

Биринчи бўлим давомида “Қўқон-1912” кўплаб ҳужумлар уюштирди, аммо рақибнинг ҳимояси қаттиқ ва жипс ҳаракат қилди. Танаффусга мезбонлар минимал устунлик билан йўл олишди — 1:0.

49-дақиқада Ҳайдаров рақиб жарима майдонида йиқилди ва ҳакам пенальти белгилади. Бироқ VAR орқали ҳолатни кўриб чиққан ҳакам қарорни бекор қилди. Бу эпизод баҳснинг бурилиш нуқтаси бўлиши мумкин эди.

Ўйин охиригача жамоалар имкон қадар ҳужум ташкил қилишга уринишди, аммо ҳисоб учрашув охиригача ўзгармади.

Ушбу ғалабадан кейин "Машъал” ўз очколарини 26 тага етказиб, жадвалда 13-ўринга кўтарилиб олди. “Қўқон-1912” эса 29 очко билан 11-поғонани эгаллаб турибди.

Суперлига, 27-тур
"Машъал” — “Қўқон-1912” — 1:0
Гол: Ҳумоюн Муртазоев (13)