"Барселона" марказий ҳимоячиси Эрик Гарсия "Пари Сен-Жермен" эътиборида қолмоқда.
Аввалроқ парижликлар испаниялик футболчини эркин агент сифатида ўз сафига қўшиб олмоқчи экани ҳақида хабарлар тарқалган эди. Миш-мишлар "кўк-анорранглилар" футболчи билан янги шартнома бўйича деярли келишувга эришгани фонида тинди, аммо, афтидан, тез орада Парижга кўчиб ўтиш варианти ҳали ҳам истисно қилинмаган. Журналист Лоик Танзининг маълум қилишича, "ПСЖ" Гарсия трансфери устида ишлашда давом этмоқда. Франция гранди 24 ёшли футболчини январь ойидаёқ арзонлаштирилган нархда сотиб олиши мумкин.
Transfermarkt экспертлари Эрик Гарсиянинг нархини 25 млн еврога баҳоламоқда. Яқинда марказий ҳимоячи шартномани узайтириб, "Барса"да қолишга умид қилаётганини тан олганди.
