Брюггеда автобусни ёқиб юборган "Барселона" мухлисининг шахси аниқланиб, полиция томонидан ҳибсга олинди, деб хабар беради Sport.es.
Нашрнинг ёзишича, ўт қўйган шахс Бельгия расмийлари томонидан ҳибсга олинган. Эркак "кўк-анорранглилар" ишқибозлар клуби аъзоси. Полиция, шунингдек, "Барселона"нинг яна икки мухлисидан файерларни тортиб олди. Бир ҳодиса "Ян Брейдел" стадионига (Брюгге, Бельгия) кираверишда, иккинчиси эса стадион ичида содир бўлган. Ҳозирда уларнинг шахси аниқланмоқда. Агар бу тасдиқланса, "Барселона"дан тегишли чоралар кўрилиши талаб қилинади.
Эслатиб ўтамиз, "Барселона" мухлислари автобуси "Брюгге"га қарши (3:3) Чемпионлар лигаси 4-тур учрашувига кетаётганда ёниб кетган эди. Тахминларга кўра, машина ичида файерлар ёқилган.
