Футбол инсайдери Фабрицио Романо "Ливерпуль"нинг нидерландиялик ҳимоячиси Виржил ван Дейк фаолиятини "Реал"да давом эттирмоқчи экани ҳақидаги миш-мишларга изоҳ берди.
"Испанияда ван Дейк ўтган ёзда "қаймоқранглилар" сафига ўтишни истагани ҳақида хабарлар тарқалди. Аммо унинг "Ливерпуль"дан ҳеч қаерга кетиш нияти йўқлигини биламан. Виржил ўзини лойиҳанинг муҳим қисми деб билади. У ҳар доим "қизиллар" билан янги келишувдан манфаатдор бўлган," - дея инсайдернинг сўзларини келтиради Team Talk.
34 ёшли ҳимоячи мерсисайдликлар сафида 2018 йилнинг январидан буён тўп тепиб келмоқда. Футболчи ва клуб ўртасидаги амалдаги меҳнат шартномаси муддати 2026/2027 йилги мавсум охирида тугайди.
