"Ювентус" ҳужумчиси Душан Влахович "Бавария"нинг эҳтимолий трансфер мақсади ҳисобланади. Сербиялик келаси ёзда, "кекса синьора" билан меҳнат шартномаси муддати тугагач, эркин агентга айланиши мумкин.
Инсайдер Фабрицио Романонинг таъкидлашича, "Бавария" 25 ёшли форварднинг вакиллари билан алоқаларни тўхтатган - томонлар октябрь ойидан бери боғланмаган. Бироқ, манбанинг аниқлик киритишича, бу немис гранди футболчига бўлган қизиқишни йўқотди, дегани эмас.
Душан Влахович "Ювентус" сафида жорий мавсум 14 та ўйинда 6 та гол урди ва 1 та голли узатмани амалга оширди. Transfermarkt портали футболчининг нархини 35 млн еврога баҳоламоқда.
