Италия терма жамоаси бош мураббийи Женнаро Гаттузо маълум қилишича, “Ливерпуль” ҳужумчиси Федерико Кьеза 2026 йилги жаҳон чемпионати саралашидаги ноябрь ойи учрашувларида терма жамоага чақирувни рад этган.

“Мен у билан тез-тез гаплашиб тураман. Ҳар бир инсоннинг шахсий қарорлари ва муаммолари бўлади — бунга ҳурмат билан қараш керак. Биз бир-биримизни яхши тушунамиз, шунинг учун футболчининг айтган сўзларини ҳурмат қилишим керак. Бошқа нарса айта олмайман,” — дея Гаттузонинг сўзларини келтиради журналист Фабрицио Романо.

Жорий мавсумда 28 ёшли ҳужумчи “Ливерпуль” сафида 12 та ўйинда майдонга тушиб, 2 та гол урди ва 3 та голли узатма берди.

Эслатиб ўтамиз, Италия терма жамоаси 13 ноябрда Молдовага, 16 ноябрда эса Норвегияга қарши баҳс олиб боради.