Бугун "Анжи" бош мураббийи Гус Хиддинк клуб раҳбарияти билан учрашиб истъефо сўради. Маҳачқалъаликлар голланд мутахассисининг илтимосини қондирди ва шартномани бекор қилдилар.
- Бу қарорга келишим осон бўлмади. Мен ҳар доим бир нарсани таъкидлаб келанман: Менинг "Анжи"даги миссиям ушбу клуб менинг иштирокимсиз ҳам ривожлана олганда тугайди, деб. Ҳозир шу кунлар етиб келди. Ишонаманки, клубнинг келажаги порлоқ ва ушбу катта футбол лойиҳасининг бир қисми бўлганимдан бахтиёрман, - дея Хиддинкнинг сўзларини келтиради клуб расмий сайти.
Шу куннинг ўзида клубнинг бош директори Айваз Казиахмедов ўйинчиларга янги бош мураббийни таништирди. Клубнинг мавсумолди тайёргарлигида қатнашган Рене Меленстен "Анжи"нинг янги бош мураббийи бўлиб иш бошлайдиган бўлди.
Эслатиб ўтамиз, 66 ёшли Гус Хиддинк 2012 йилнинг февраль ойидан буён махачқалъаликларни бошқариб келаётганди. Бу вақт давомида жамоани 2012-13 мавсумнинг бронза медалига ва Россия кубогининг финалига олиб келди.
