"Интер Майами" ҳужумчиси Лионель Месси "Барселона" билан қайғули хайрлашувини яна бир бор эслади ва келажакдаги режалари ҳақида гапирди.
Аргентиналик футболчи "кўк-анорранглилар" сафини 2021 йилнинг ёзида тарк этган, ўшанда унинг шартномаси муддати тугаганди. Ҳужумчи футболчилик фаолиятининг бошиданоқ Каталония клубида тўп тепган.
"Фаолиятимни "Барселона"да якунламоқчи эдим, аммо, афсуски, вазият бошқача тус олди. Ҳозир Майамида яна бир неча йил қолишни режалаштиряпман, аммо келажакда албатта Барселонага қайтамиз. Бу менинг уйим, мен соғинаман", - деди Месси.
Бир неча ой олдин 38 ёшли футболчи "Интер Майами" билан шартномасини 2028 йил охиригача узайтирган эди.
