Шу кунларда Испаниянинг Барселона шаҳрида сув спорти турлари бўйича 15 – Жаҳон чемпионати баҳслари ўтказилмоқда.

Мазкур йирик спорт анжуманида дунёнинг 181 давлатидан келган 2293 нафар спортчи, сузиш, синхрон сузиш, сувга сакраш, сув полоси, очиқ сув ҳавзасида сузиш ва хай-дайвинг бўйича 68 комлект медаллар учун кураш олиб борадилар.

Тўртинчи августга қадар давом этадиган мусобақаларда мамлакатимиз спортчилари сув полоси, синхрон сузиш ва сузиш бўйича бўлиб ўтадиган мусобақаларда Ватанимиз шарафини ҳимоя қиладилар.

Бугун, жаҳон чемпионатининг бешинчи куни синхрон сузиш бўйича ҳал қилувчи финал баҳслари ўтказилади. Афсуски, медаллар учун курашга киришадиган спортчилар орасидан ҳамюртларимиз Анастасия Рузметова ва Анастасия Здрайковская ўрин ола билишмади. 

Сув полоси бўйича ўтказилаётган мусобақаларда “А” гуруҳидан ўрин эгаллаган Ўзбекистон аёллар терма жамоаси гуруҳдаги иккинчи учрашувни голландиялик вотерполчиларга қарши ўтказиб, 3:30 ҳисобида имкониятни бой бердилар.  Вотерполочиларимиз гуруҳда сўнгги баҳсни 25 июль куни Испания терма жамоасига қарши ўтказишади.

28 – июль куни сув спорти турлари бўйича ўтказилаётган жаҳон чемпионатида сузиш мусобақаларига старт берилади. Унда жами 40 комплект медаллар ўйналади. Сузиш бўйича ўтказиладиган мусобақаларда Ватанимиз шарафини “Лондон-2012” Олимпия ўйинлари қатнашчилари Раънохон Омонова, Юлдуз Қўчқорова, шунингдек, Алексей Дерлюгов, Владислав Мустафин ва Даниил Букин ҳимоя қиладилар.