"Милан" 30 ёшли франциялик дарвозабон Майк Меньян билан янги шартнома имзолашдан умидини узмаяпти. Аввалроқ, А Серия клуби дарвозабонга 2028 йилгача мўлжалланган шартнома таклиф қилгани ва унинг маоши йилига 2,8 миллион евродан 5,5 миллион еврогача оширилиши ҳақида хабар берилганди. Аммо ОАВ Меньян буни рад этганини таъкидлади. "Милан" спорт директори Игли Таре вазиятга изоҳ берди.
"Ёзда Майк билан яхши суҳбатлашдик. Биз тинч муҳитда мулоқот қиламиз. Биз келишувга эришдик, келинг, ҳозир қўлимиздан келганини қилайлик ва кейин нима бўлишини кўрайлик. Меньянда ҳаммаси жойида", - дея Таранинг сўзларини келтиради футбол инсайдери Фабрицио Романо.
Аввалроқ, Меньян учун "Челси" ва "Ювентус" клублари кураш олиб бораётгани маълум бўлганди. Жорий мавсумда дарвозабон "Милан" сафида 14 та ўйинда майдонга тушди ва уларнинг ярмини голсиз ўтказди.
