Англиядаги «London Chess Classic» турнирида кеча 7-тур ўйинлари ўтказилди. Унда иштирок этаётган ўзбекистонлик гроссмейстер Нодирбек Абдусатторов кетма-кет олтинчи ғалабани қўлга киритди.

Ҳамюртимиз бу сафар англиялик Люк МакШейнга қарши оқ доналарда ўйнади. Ўзбек шахматчиси дебютдан кичик устунлик билан чиқди ҳамда позицон жиҳатдан аниқ юришларни амалга ошириб, рақиб йўл қўяётган кичик ноаниқликлар эвазига ўз устунлигини ошириб борди. 26-юришда Абдусатторовнинг рақибнинг заиф пиёдаларидан бирини уриб олди. Шундан сўнг 30-юришда томонлар Фарзинларни алмашишди.

Нодирбек ортиқча пиёдани охир-оқибат Фарзинга олиб чиқиш учун техник имкониятга эга эканини тушунган МакШейн 56-юришда таслим бўлишга қарор қилди.  

Ушбу ғалабадан сўнг Нодирбек 6,5 очко билан пешқадамликни янада мустаҳкамлади. Иккинчи ўриндаги Алиризо Фирузжа бу сафар ҳам дуранг ўйнади ва мусобақа тугашига 2 тур қолганида ўзбек спортчисидан 2,0 очко ортда қолмоқда. Турнирда 3 декабрь — дам олиш куни. 4 декабрь куни эса Нодирбек Абдусатторов қора доналарда Фирузжага қарши баҳс олиб боради.