"Манчестер Юнайтед" ҳужумчиси Жошуа Зиркзее "Рома"га ўтмайдиган кўринади.

Нидерландиялик футболчи римликларнинг январь ойидаги асосий трансфер мақсади саналганди, аммо энди клуб раҳбарияти бошқа номзодларга ўтишга қарор қилди. Il Messaggero хабарига кўра, "бўрилар" вакиллари 24 ёшли форварддан трансферда етарлича жонбозлик кўрмаган - у Англияда доимий ўйин амалиётига эга бўлмаса-да, кетишини талаб қилмаган.

Манбанинг таъкидлашича, "Рома" "Тоттенхэм"дан Матис Телни таклиф қилишга мойиллик билдирмоқда. Француз жамоада захира футболчиси ҳисобланади, шу боис у вазиятни ўзгартиришни истайди.

Transfermarkt портали Зиркзее ва Телнинг нархини мос равишда 28 ва 35 млн еврога баҳоламоқда.