“Катта дубулға” турнирларининг олти карра ғолиби, жаҳоннинг биринчи рақамли ракеткаси ҳисобланган испаниялик теннисчи Карлос Алкарас уч йил ичида иккинчи бор Стефан Эдберг номидаги “Ҳалол ўйин” мукофотига сазовор бўлди. Бу ҳақида ATP матбуот хизмати хабар берди.

Ушбу номинацияда Алкарас канадалик Феликс Оже-Аляссим, болгариялик Григор Димитров ва норвегиялик Каспер Руудни ортда қолдирди. Номзодлар Халқаро теннис журналистлари ассоциацияси (ITWA) томонидан овоз бериш орқали аниқланган бўлиб, ғолиб илк бор дунёнинг амалдаги ва собиқ биринчи ракеткалари бўлган 29 нафар теннисчи томонидан танланган.

Алкараснинг бу йилги энг ёрқин фейр-плей намойишларидан бири Роланд Гарросъда Бен Шелтонга қарши 4-босқич баҳсида юз берди. Ўша эпизодда Алкарас тўпни қайтариш учун максимал даражада чўзилиб, зарба берди. Дастлаб очко Алкарасга берилган эди, бироқ у дарҳол ҳакамга мурожаат қилиб, зарба пайтида ракеткани қўлидан чиқариб юборгани ва тўпни ракетка қўлида бўлмаган ҳолатда қайтарганини айтди. Қоидаларга кўра, бундай эпизодда очко Шелтонга берилиши керак эди.

“Буни айтмасам, ўзимни айбдор ҳис қилардим”, — деган эди Алкарас ўйин якунида.

Эндиликда Алкарас ушбу кўрсаткич бўйича Тодд Мартин, Алекс Корретха ва Парадорн Шричапан билан тенглашди. Рўйхатнинг юқори қисмида эса “Катта дубулға” турнирларининг 20 карра чемпиони Рожер Федерер (13 марта) етакчилик қилмоқда. Ундан сўнг Стефан Эдберг ва Рафаэль Надаль (ҳар иккиси 5 мартадан), шунингдек, Патрик Рафтер (4 марта) қайд этилган.

22 ёшли испаниялик теннисчи ушбу мукофотни илк бор 2023 йилда қўлга киритган, у ўша мавсумни ATP рейтингида биринчи ўринда якунлаган эди. 2025 йилги мавсумда эса Карлос иккита “Катта дубулға” турнири — Roland Garros ва US Open мусобақаларида ғолиб бўлди, учта Masters турнирини ютди ва учта ATP 500 тоифасидаги мусобақада зафар қучди.