“Katta dubulg‘a” turnirlarining olti karra g‘olibi, jahonning birinchi raqamli raketkasi hisoblangan ispaniyalik tennischi Karlos Alkaras uch yil ichida ikkinchi bor Stefan Edberg nomidagi “Halol o‘yin” mukofotiga sazovor bo‘ldi. Bu haqida ATP matbuot xizmati xabar berdi.

Ushbu nominasiyada Alkaras kanadalik Feliks Oje-Alyassim, bolgariyalik Grigor Dimitrov va norvegiyalik Kasper Ruudni ortda qoldirdi. Nomzodlar Xalqaro tennis jurnalistlari assosiasiyasi (ITWA) tomonidan ovoz berish orqali aniqlangan bo‘lib, g‘olib ilk bor dunyoning amaldagi va sobiq birinchi raketkalari bo‘lgan 29 nafar tennischi tomonidan tanlangan.

Alkarasning bu yilgi eng yorqin feyr-pley namoyishlaridan biri Roland Garros’da Ben Sheltonga qarshi 4-bosqich bahsida yuz berdi. O‘sha epizodda Alkaras to‘pni qaytarish uchun maksimal darajada cho‘zilib, zarba berdi. Dastlab ochko Alkarasga berilgan edi, biroq u darhol hakamga murojaat qilib, zarba paytida raketkani qo‘lidan chiqarib yuborgani va to‘pni raketka qo‘lida bo‘lmagan holatda qaytarganini aytdi. Qoidalarga ko‘ra, bunday epizodda ochko Sheltonga berilishi kerak edi.

“Buni aytmasam, o‘zimni aybdor his qilardim”, — degan edi Alkaras o‘yin yakunida.

Endilikda Alkaras ushbu ko‘rsatkich bo‘yicha Todd Martin, Aleks Korretxa va Paradorn Shrichapan bilan tenglashdi. Ro‘yxatning yuqori qismida esa “Katta dubulg‘a” turnirlarining 20 karra chempioni Rojer Federer (13 marta) yetakchilik qilmoqda. Undan so‘ng Stefan Edberg va Rafael Nadal (har ikkisi 5 martadan), shuningdek, Patrik Rafter (4 marta) qayd etilgan.

22 yoshli ispaniyalik tennischi ushbu mukofotni ilk bor 2023 yilda qo‘lga kiritgan, u o‘sha mavsumni ATP reytingida birinchi o‘rinda yakunlagan edi. 2025 yilgi mavsumda esa Karlos ikkita “Katta dubulg‘a” turniri — Roland Garros va US Open musobaqalarida g‘olib bo‘ldi, uchta Masters turnirini yutdi va uchta ATP 500 toifasidagi musobaqada zafar quchdi.