"Ньюкасл" ярим ҳимоячиси Бруно Гимараэс жорий қишда клубини ўзгартирмоқчи.
Журналист Мигель Деланига кўра, Бруно Гимараэснинг вакилларига яқин манбалар "Манчестер Юнайтед" билан алоқага чиққан. Таъкидланишича, бразилиялик футболчи "Ньюкасл"даги ҳозирги вазиятдан ҳафсаласи пир бўлган. У ёзда клуб катта вазифаларни ҳал қилиш учун бирорта ҳам сифатли футболчи сотиб олмаганидан норози. Таъкидланишича, Гимараэслар оиласи Англиянинг энг қулай бўлмаган шаҳарлари қаторига кирувчи Ньюкасл-апон-Тайн шаҳрида яшашни ёқтирмайди. Хавбекнинг ўзи ҳам бош мураббий Эдди Хауга жамоадан кетмоқчи эканини маълум қилган.
Гимараэс 2022 йилдан буён "қарғалар" сафида тўп тепиб келмоқда. Бу мавсумда у барча мусобақаларда 23 та ўйинда майдонга тушиб, бешта гол урди ва бешта голли узатмани амалга оширди. Футболчининг клуб билан шартномаси 2028 йилгача мўлжалланган.
