Нигерия футбол федерацияси ЖЧ–2026 саралаш босқичида ДР Конгога қарши ўтказилган ўйин (1:1, пенальтилар — 3:4) натижалари бўйича Халқаро футбол федерациясига (ФИФА) расмий шикоят билан мурожаат қилди. Бу ҳақда ESPN нашри хабар бермоқда.

Манба маълумотларига кўра, Нигерия томони ДР Конго терма жамоаси таркибида ушбу учрашувда қатнашган олти нафардан тўққиз нафаргача футболчи фуқароликни ўзгартиришда қоидабузарликларга йўл қўйгани сабабли ўйнаш ҳуқуқига эга бўлмаган, деб ҳисобламоқда. Гап Европада туғилган ва Европа паспортларидан расман воз кечмаган ўйинчилар ҳақида кетмоқда. Конго ДР қонунчилигига кўра эса, ушбу мамлакатда қўш фуқаролик тақиқланган.

ФИФА мазкур шикоят бўйича якуний қарорни март ойида старт оладиган жаҳон чемпионатининг қитъалараро плей-офф босқичига қадар чиқариши кутилмоқда.

Қайд этиш жоиз, Нигерия терма жамоаси ЖЧ–2026 Африка саралаш плей-оффининг финалида Конгога мағлуб бўлди (1:1, пенальтилар — 3:4). Шу тариқа, конголиклар қитъалараро плей-офф йўлланмасини қўлга киритди, Нигерия эса жаҳон чемпионатига чиқиш имкониятини йўқотди.