"Манчестер Юнайтед"нинг тажрибали ярим ҳимоячиси Каземиро жамоада қолмоқчи, шунинг учун клуб раҳбарияти у билан янги шартнома бўйича музокаралар олиб бормоқда. Бу ҳақда TEAMtalk нашри учун журналист Грэм Бэйли хабар бермоқда.
Манбага кўра, аъло даражадаги спорт формасида бўлган Каземиро "МЮ" билан янги шартнома имзолашга тайёрлиги сабабли бошқа клублар вакиллари билан музокараларни тўхтатган. Унинг "қизил иблислар" билан амалдаги шартномаси 2026 йилнинг июнь ойи охиригача мўлжалланган. Шартномада яна бир мавсумга узайтириш имконияти кўрсатилган, аммо раҳбарият футболчининг молиявий талабларини камайтирмоқчи ва ҳамкорликни давом эттиришнинг бошқа шартлари бўйича келишиб олишга ҳаракат қилади.
Жорий мавсумда 33 ёшли бразилиялик "Манчестер Юнайтед" сафида АПЛда 15 та ўйинда 4 та гол ва 1 та голли узатмани амалга оширди.
