Иккинчи босқич баҳсларига тайёргарлик кўраётган "Андижон" иккинчи ўртоқлик учрашувини ўтказди. Олий лига вакили “Навбаҳор” жамоаси бугун Андижонга ташриф буюрди.

Ўзига хос водий дербиси бўлгани боис стадионга кўплаб мухлислар келишди. Дерби кутилганидек қизиқарли кечди. Учрашувнинг 14-дақиқасида Асқар Жадигеров жарима зарбасини қойилмақом қилиб бажариб ҳисобни очди. Шундан сўнг иккала жамоада ҳам гол уриш учун имкониятлар бўлди. Аммо биринчи бўлим якунланишига оз вақт қолганда меҳмонлар ҳисобни тенглаштира олишди. Аюбхон Гаппаровнинг зарбасидан сўнг тўп Юрий Цой қўриқлаган дарвозадан жой олди.

Иккинчи бўлимда “Навбаҳор” таркиби тўлалигича ўзгарди ва майдонга етакчи ўйинчилар туширилди. Шунингдек, Азамат Абдураимов ҳам иккинчи таймда деярли бутун таркибни алмаштирди. Учрашувни андижонликлар ғалаба билан якунлашлари ҳам мумкин эди. Лекин Баҳром Абдураҳимов ва Раҳим Қодиров жуда қулай имкониятлардан фойдалана олишмади. Вазиятлар кўп бўлишига қарамай, иккинчи бўлимда дарвозалар даҳлсиз қолди. Шу тариқа, водий дербисида кучлар тенг келди.

“Андижон”: Ю.Цой (С.Смородин; А.Турсунбоев), И.Ибрагимов (Д.Маҳмудов), Д.Турсунов (А.Қаюмов), А.Азизов (Р.Қодиров), А.Раҳмонов (А.Абдуқодиров), А.Тўхтасинов (Ф.Ҳасанбоев), Б.Ғозиев, Б.Абдураҳимов (Т.Маҳмудов), Р.Раҳмонов (С.Соипов), А.Жадигеров (А.Жўрабоев), Д.Краев (Л.Солиев).
“Навбаҳор”: П.Леус, Б.Тўрабоев, Қ.Муҳаммаджонов, Т.Яфаров, Д.Умаралиев, М.Расулов, А.Баҳриддинов, С.Ҳамидов, А.Султонов, А.Гаппаров, О.Муҳиддинов (И.Исломов).
Захирадан майдонга тушганлар: Р.Аъзамов, Ж.Меҳмонов, Т.Султонов, А.Рисқуллаев, И.Бойдедаев, Л.Кошелев, А.Аҳмедов, Ғ.Жўраев, Р.Аҳмедов.
Голлар: А.Жадигеров, 14 - 1:0. А.Гаппаров, 43 - 1:1.

"Андижон" энди навбатдаги ўртоқлик учрашувини 5 август куни “Қўқон-1912” клубига қарши ўтказиди. Бу ўйин “Соғлом авлод” стадионида бўлиб ўтади.