Марокаш терма жамоаси Африка Кубогининг дастлабки ўйинида Комор ороллари устидан 2:0 ҳисобида ғалаба қозонди. Ғолиблар таркибидаги энг яхши футболчи Мадриднинг "Реал" клуби ярим ҳимоячиси Браим Диас бўлди, деб ёзади WhoScored.
Аввалига 26 ёшли хавбек пенальти ишлаб олди, бироқ шериги уни голга айлантира олмади. Шундан сўнг, Диас жамоа ҳужумини бошқарди ва ўзи мусобақадаги илк голни урди.
Бундан ташқари, Браим ўтган беллашувда иккита калит узатмани амалга оширди, дарвозага иккита зарба йўллади ва пасларда 100 фоизлик натижа кўрсатди. Футболчи ўз ўйини учун 7,91 балл олди.
"Реал" сафида футболчи ҳозирча унчалик кўп имкониятларга эга эмас, у ҳар бир ўйинда ўртача атиги 26 дақиқа майдонда ҳаракат қилади. Шунга қарамай, у барча мусобақаларда битта гол ва учта голли узатмани амалга оширди.
