Жаҳон футболи юлдузи Лионель Месси Каталониянинг "Барселона" клубига қайтиши мумкин, аммо футболчи сифатида эмас. Бу ҳақда El Nacional журналистлари хабар берди.
Манбага маълум бўлишича, "кўк-анорранглилар" келажакда аргентиналик футболчини клуб тизимида раҳбарлик лавозимларига таклиф қилиш вариантини кўриб чиқмоқда.
Эслатиб ўтамиз, Месси "Барселона" тарбияланувчиси ҳисобланади. У 2005 йилдан 2021 йилгача асосий жамоада ўйнаган.
Ҳозирда Лионель Американинг "Интер Майами" жамоасида ўйнамоқда. Ҳужумчининг клуб билан меҳнат шартномаси 2028 йил охиригача мўлжалланган. 38 ёшли футболчининг трансфер нархи 15 миллион еврони ташкил этади.
